അങ്ങനെ അത്തവണയും എത്തവണത്തെയും പോലെ ജൂബിലിത്തിരുന്നാള് എത്തി.. മരിയന് റാലിയും , ടാബ്ലോയും, രൂപം എഴുന്നെള്ളിരും, വെടിക്കെട്ടും,... അങ്ങനെ എല്ലാ കിടുപിടിയും ഒണ്ടായിരുന്നു...
ജൂബിലിക്ക് പാലായില് ആകെ ഒരു തിമിര്പ്പാണ്..
ജൂബിലിക്ക് പാലായില് ആകെ ഒരു തിമിര്പ്പാണ്..
എല്ലാ തിമിര്പ്പും കഴിഞ്ഞ് ഞാനും കൂട്ടുകാരന് കണ്ണനും കൂടെ മടങ്ങുകയാണ്..
രാത്രി നടന്നാണ് വീട്ടിലേക്ക് മടക്കം..
ടൌണില് നിന്ന് വീട്ടിലേക്ക് വരുന്ന വഴിക്കാണ് ട്രീസയുടെ വീട്.. റോഡിന്റെ തൊട്ട്അരികില്.. ട്രീസ ആരാന്ന് ചോദിക്കരുത്.. അത് പിന്നെ പറഞ്ഞു തരാം..
"എടാ കണ്ണാ ഇപ്പഴും ലൈറ്റ് ഒണ്ടല്ലോ.. അവള് ഉറങ്ങിയില്ലേ.. " ഞാന് തെല്ല് ആകാംഷയോടെ ചോദിച്ചു..
"ഹൊ... അവന്റെ ഒരു ജിജ്ഞാസ.. അവള്ടെ തന്തയെ അറിയാല്ലോ, തനി കാട്ടുമാക്കാന് ആണ്.. " കണ്ണന് കണ്ണുരുട്ടി..
ഉള്ളില് കിടക്കുന്ന സ്പിരിറ്റിന്റെ സ്പിരിറ്റാണോന്നറിയില്ല.. വല്ലാത്ത ഒരു ധൈര്യം ആരുന്നു അപ്പോള്..
"എടാ കണ്ണാ അവള് ഉറങ്ങിട്ടില്ല.. ദാണ്ടേ എനിക്കവളെ കാണാടാ..
ശോ എനിക്കിവിടുന്ന് പോരാന് തോന്നുന്നില്ലെടാ ..." ഞാന് ആകെ ഒരു റൊമാന്റിക് മൂഡില് എത്തി..
കണ്ണന് 'പ' യില് തുടങ്ങുന്ന എന്തോ ഒരു തെറിയാണ് മറുപടിയായിട്ട് പറഞ്ഞേ..
എന്നാലും അവളെ ഇത്രയും അടുത്ത് കണ്ട സ്ഥിതിക്ക് ചുമ്മാതെങ്ങനാ പോകുന്നെ...
എന്തേലും ഒക്കെ ചെയ്യാന് ഒരു തോന്നല്..
"എടാ നമുക്ക് കോളിംഗ് ബെല് അടിച്ചാലോ.."
"അടിച്ചിട്ട്???"
"അടിച്ചിട്ട് നമുക്കോടാം.."
അത് കേട്ടപ്പോ അവനും ഒരു രെസം ഒക്കെ തോന്നി..
അവന് റോഡില് നില്ക്കും, ഞാന് ബെല് അടിച്ചിട്ട് ഓടി ഇറങ്ങി വരും.. ഇതായിരുന്നു പ്ലാന്.
നല്ല കൂരാ കൂരിരുട്ടാണ്..
വീടിന്റെ അകത്തുന്ന് വരുന്ന വെളിച്ചം മാത്രം ഒണ്ടു പുറത്ത്..
ഞാന് പമ്മി പമ്മി വാതില്ക്കല് എത്തി..
സിഗരട്ട് പുകയുന്ന മണം വരുന്നൊണ്ട്... തന്ത അകത്തിരുന്ന് പുകക്കുവാരിക്കും..
ഞാന് അകത്തേക്ക് നോക്കി.. ഒരു മഞ്ഞ ഫ്രോക്കും ഇട്ട് അവള് എന്തോ വായിക്കുകയാണ്... ആഹഹ എന്താ സൗന്ദര്യം...
അതിന്റെ ഒരു ആവേശത്തില് എന്റെ വിരലുകള് കോളിംഗ് ബെല്ലില് ആഞ്ഞു ആഞ്ഞു ഞെങ്ങി...
കിണി കിണി കിണി......
യ്യോ.. ഠോ....
കര്ത്താവേ..
ഉള്ളിലൂടെ ഒരു മിന്നല് പിണര് പാഞ്ഞു..
നോക്കുമ്പോള് ഒരു കറുത്ത രൂപം.. സാക്ഷാല് കാട്ടുമാക്കാന് അവളുടെ തന്ത കറിയാച്ചന് മണ്ണ് തിന്നുന്നു...
തത്സമയം ആകാശത്തെക്ക് നോക്കി റം അടിച്ചോണ്ടിരിക്കുകയായിരുന്നു കറിയാച്ചന് ..
ബെല്ലടി കേട്ട ഞെട്ടലില് കറിയാച്ചനും കസേരയും പുറകോട്ട് മറിഞ്ഞതാണ്....
ഒച്ച കേട്ട ഞെട്ടലില് സര്വ്വ ജീവനും എടുത്ത് ചാടി കറിയാച്ചന്റെ ഫുള് റം ബോട്ടിലും ലിവര് ഫ്രൈയും എന്റെ കാലു തട്ടി ചിതറി തെറിച്ചു.. റം നിലത്ത് വീണ ദുഃഖം കൊണ്ടാണോ എന്നറിയില്ല.. കറിയാച്ചന് നിലത്തുന്ന് എണിറ്റില്ല..
സര്വ്വ ജീവനും എടുത്തോണ്ട് ഓടിയ ഞാന് ആ വീടിന്റെ മതില് എങ്ങനെ ചാടിക്കടന്നു എന്നത് ഇപ്പഴും മനസ്സിലാകുന്നില്ല..
കണ്ണാ ഓടിക്കോടാ... പണി പാളി...
ഒച്ചയും ബഹളവും കേട്ട് അവിടിവിടങ്ങളില് ഒക്കെ ലൈറ്റുകള് വീഴുന്നൊണ്ടായിരുന്നു..
എവിടൊക്കെ ഇടിച്ചെന്നോ.. എന്തൊക്കെ പോയെന്നൊ ഒരു പിടുത്തവും ഇല്ല..
എന്തായായും ഞങ്ങള് പിടിക്കപ്പെട്ടില്ല...
പുറത്ത് കാണത്തക്ക വിധം പരുക്കുകള് ഇല്ലായിരുന്നു എങ്കിലും.. അവിടിവിടങ്ങളില് ആയൊള്ള നീര് വലിയാന് കുറച്ച് ടൈം എടുത്തു..
പിറ്റേന്ന് കവലക്കല് ഒരു പുതിയ ന്യുസ്..
കറിയാച്ചന്റെ വീട്ടില് കള്ളന് കേറി... അതി സാഹസികമായി കള്ളനെ ആക്രമിച്ച കറിയാച്ചന്റെ തലക്ക് പിറകില് മുറിവേറ്റു..
"എന്നാ കറിയാച്ചാ ഒണ്ടായെ??"
"ഓ ഒരുത്തന് കക്കാന് വീട്ടില് കേറിതാ ... രണ്ട് കൊടുത്ത് വിട്ടിട്ടൊണ്ട് , ഇനി അവന് ഈ വഴിക്ക് വരുകേല..." കറിയാച്ചന് തട്ടി വിടുന്നോണ്ട്...
